တၢ်သးမုာ်လၢ စုာ်ပူၤ
ယတံၤသကိးအးလီၤ အဖိမုၣ်အသးအိၣ် ၄ နံၣ်ဖိတဂၤလၢယစုပူၤ ဒ်သိးယကစိာ်ထီၣ် အီၤလီၤႉ ယစိာ်ထီၣ်ဖိသၣ်န့ၣ် လၢယစုလိၤ တယံာ်ဘၣ်ဒီး အ၀ဲမၤသီၣ်မၤသဲအကလုၢ်လၢတၢ်တဘၣ်သူၣ်ဘၣ်သးအပူၤလီၤႉ ယဖိးဟုအီၤ ဃံးထီၣ်တစဲးဒီး ကျံၤလီၤယဘိးပၤ လၢအခိၣ်ဖီခိၣ် ၀ံၤယမၤသီၣ် ယကလုၢ်ကဖီလီဒီး ထွၣ်ယဲာ်ယီာ်အီၤ ကယီယီဖိန့ၣ်လီၤႉ ယမ့ၢ်မိၢ်တဂၤအိၣ်ဒီး တၢ်လဲၤခီဖျိ ၁၄ နံၣ်အဃိ ယဆိကမိၣ် ယမၤမုာ်မၤဘှီၣ်အသးကန့ၢ်လီၤႉ တန့ၢ်ဘၣ်ႉ အ၀ဲအသး တမုာ်အါထီၣ်အဃိ ယဘၣ်ဟ့ၣ်လီၤက့ၤအီၤ လၢအမိၢ်အစုပူၤန့ၣ်လီၤႉ ဖဲန့ၣ် တၢ်မုာ်တၢ်ခုၣ် နုာ်လီၤဆူအသးပူၤ တဘျီဃီ န့ၣ်လီၤႉ အကလုၢ်အသီၣ်အသဲလီၤမၢ်ဒီး အနီၢ် ကစၢ် ကပုာ်လုးဖိန့ၣ် အိၣ်မုာ်အိၣ်ခုၣ်လၢ ပှၤလၢ အနာ်၀ဲ အစုလိၤန့ၣ်လီၤႉ ယတံၤသကိးန့ၣ် ကဘၣ်မၤကဆှၣ်လီၤ အဖိမုၣ်ဖိအတၢ်ကိၢ်တၢ်ဂီၤဒ်လဲၣ်န့ၣ် သ့ၣ်ညါ၀ဲ လီၤတံၢ် လီၤဆဲးလီၤႉ
ကစၢ်ယွၤဟ့ၣ်အဖိတဖၣ်တၢ်မုာ်သး ဒ်မိၢ်တဂၤပာ်အသးကပုာ်လုးဖိဒီး တၢ်နာ်န့ၢ်အီၤသ့‚ ဒီးအသူၣ်ပ့ၢ်သးဆှါလၢ ကမၤဘရၣ်ဘှီၣ် မၤဂၢၢ်အဖိအသးအဂီၢ်န့ၣ်လီၤႉ ဖဲပသူၣ်လီၤဘှံးသးလီၤတီၤ ဒီးသူၣ်အုးသးအုးဒိၣ်မးအခါ ကစၢ်ယွၤစိာ်ပှၤ လၢတၢ်အဲၣ် ကပုာ်လုးဖိလၢ အစုတီၤလိၤန့ၣ်လီၤႉ…
လီၤဂၢ်ယွၤလီၤလၢ ယစုမုၢ်တဖၣ် အကဆူး
ဖဲယမၤတိၢ်ဘၣ်ထံးဘၣ် ယတၢ်အီဆၢအလီခီလၢ တၢ်အီၣ်တၢ်အီကျးအစီၢ်နီၤခိၣ် အကပၤထံးန့ၣ်‚ တၢ်ကျဲထံဆၢလီၤလဲာ်လၢစီၢ်နီၤခိၣ်ဒီး ဆူသ့ၣ်ဘၣ်ခိၣ်လိၤလီၤႉ လၢတၢ် မဲာ်ကိၢ်နါကိၢ်အပူၤ‚ ယကျဲးစၢးလူၤဖီၣ်ထံ ဒီးထံယွၤလီၤလၢယစုလိၤလီၤႉ ယတၢ်ကျဲးစၢး တဖၣ် တကဲထီၣ် တၢ်ဘျုးနီတစဲးဘၣ်‚ တၢ်ကျဲထံဆၢတဖၣ်ယွၤလီၤ လၢယစုမုၢ်တဖၣ် အကဆူးလီၤႉ လၢခံကတၢၢ်တခီ‚ ယစုညါသး ဟံးန့ၢ်ဃာ် တၢ်ထံစှၤန့ၢ် နီၣ်တၢၤဆံးဖိတဘ့ၣ်‚ မ့မ့ၢ် ယခီၣ်န့ၣ် အိၣ်ဆၢထၢၣ်လၢ ထံကလီာ်ဖိအပူၤန့ၣ်လီၤႉ
ယတၢ်အိၣ်မူလၢ ယမုၢ်နံၤတဖၣ် မ့ၢ်တၢ်ဒ်န့ၣ် အသိးလီၤႉ ယထံၣ်လီၤက့ၤသး လၢယဂုာ်ကျဲးစၢးခီဖျိကွံာ် တၢ်ကီတၢ်ခဲတဖၣ်လၢ တၢ်ချုးခံနိးသးအပူၤ‚ တၢ်တခါ စုာ်စုာ်န့ၣ် ယသုးကျဲၤအီၤ လီၤတံၢ်‚ ဒီးဒီသူၣ်ဒီသးလၢ တၢ်အိၣ်သးမၤသးတဖၣ် အဖီခိၣ်လီၤႉ ဖဲယကကျဲးစၢးသပှၢ်ပှၢ်ဒၣ်၀ဲန့ၣ် ယစုလၢ အဂံၢ်ပှဲာ်၀ဲတဖၣ် မၤဒီဒၣ်တၢ်အဆံးအက့မ့ၢ်ဂ့ၤ‚ တၢ်အဒိၣ်ဒီခါမ့ၢ်ဂ့ၤ တန့ၢ်၀ဲဘၣ်န့ၣ်လီၤႉ တၢ်တမံၤမံၤန့ၣ် လီၤလဲာ်ယွၤပူၤကွံာ် လၢယစုမုၢ်တဖၣ်အကဆူး ဒီးကဲထီၣ်ထံဖှိၣ်လၢ ယခီၣ်လၢသ့ၣ်ဘၣ်ခိၣ်‚ ဒီးယအိၣ်တ့ၢ်ဒီးသး လၢအဘၣ်တံာ်တာ်နးမးန့ၣ်လီၤႉ ယစုဒီးယစုမုၢ်ဘိ တဖၣ် ဖီၣ်ဃာ်တၢ်တဖၣ်န့ၣ် တန့ၢ်ဘၣ်‚ ယမၤတၢ်တဖၣ် တဘၣ်ဘၣ်၀ဲဘၣ်ႉ…